قبل ما ننزل الاتتخابات ممكن نفتكر في الي دفعوا ثمن الانتخابات ديه حياتهم ممكن مانتفهش من الشباب عشان دول الي من غيرهم كان زمانك بتشحت و تشحت عيالك في عهد جمال مبارك و منتهى املك ان عمرو موسي يكن رئيس وزراء و بتدور لإبنك على واسطة شغل ولا قريب يقعد عنده لحد مايلاقي شغل بلد خليجي عشان يتجوز و يجيب شقة و ياكل و يشرب كويس مع ان ديه اساسيات و اتحولت لأحلام.
ممكن ماننساش الي ناموا في الميدان و مشهد الجري من الجمال و محمد محمود و ماسبيرو ممكن ماننساش خالد سعيد و مينا دانيال و جيكا و عماد عفت ممكن ماننساش حرارة و غيرهم الي مفكروش مرتين و هما بيجيبوا الحق ممكن ماننساش احباط كلمة مش هاتقدر و خليهم يتسلوا ممكن ممكن ماتنساش المجلس العسكري.
عايز ترقص بعد الانتخابات اجل الموضوع لما يرجع حق الي مات و لما ترجع الاحلام اساسيات و لما نبطل نعد الي ماتوا ونحط صورهم بشريطة سودة...ممكن نفضل على مواقفنا و نتمسك بإنسانيتنا في رفض اي عنف و نرفض مبدأ الابادة و نغير مفهوم ديكتاتورية النخبة...ممكن نتعلم نسمع بعض عشان احنا حقوقنا واحدة.
ممكن نفسنا يبقى اطول لأن الثورة مش حدث ديه حالة بتاخد سنين و المنتصر هو الابقى بأفكاره..ممكن تؤمن بقدراتك و تجهز نفسك انك تكون مطرح ما اخر احلامك هايكون.
ممكن نقف دقيقة حداد على قيم على وشك الانقراض و نبدأ توعية من حولنا...و قبل مانحكم على الناس نحط نفسنا مكانهم ممكن ماننشرش اخبار غير لما نتأكد منها و ممكن نركز في الشغل و مانتفهش من طموحات حد حتى لو كان طموحه الجواز من واحدة ولا شغلانة في شركة
ممكن تكون اجابتك على كلامي اكيد و احس ان لسه فيه امل او يكون ردك بالتهكم او المعارضة على كلامي وساعتها هايطول مشاور اقناعى ليك و املى في بلد احسن مش هايموت
No comments:
Post a Comment