فتح كلام..!!

مش عارف هو انا ليه تايه و ليه مش بنجز في حالة من الاكتئاب الغريب و ايه الجديد يعني الي يسر النفس بكل الي بيحصل لا ابتديت مذاكرة ولا خلصت الشغل فتحت التليفزيون لقيت السيسي عامل لقاء مع 25 صحفي حسيت بالعجز زي اي مصري لما مقدروش عليه و لما فتحت اسمع اغاني لقيت اغنية اسمها كنت سأنجب منك قبيلة قفلتلي اليوم و هي بادئة الاغنية بوشوشة تقولو فيها نفس اسم الاغنية قفلتها و هي ماسكة رجليه و بتحلف تغسلها سيبك من القرف و مدي تساؤلي عن ذنبي في اني اعرف تفصيلة زي ديه

فتحت بابتسم ليسرا الهواري عشان وداني تنسى العلاقة الغير سوية الي سمعتها في الاغنية الي فاتت....وقررت اعمل حاجة في حياتي و قررت اني اكتب

 حاجة جديدة على النت و برغم ان القرار متأخر واني في اقل الاوقات الي حاسس اني عايز اكتب فيها ابتديت

بس ايه ده هاقول ايه يعني انا مفيش حاجة في دماغي الا التوهان عشان شوية الحاجات الكتير الي عليا يمكن ميكونش لكلامي اي ثلاثين لازمة بس من منطلق ان هي جت عليا و الجو ده قررت اكون الشخص الي هاتقرا كلامة زي ملايين مالمصريين الي بيهتكوا معظم خصوصياتك بداية من الراجل الي بيسألك عن نوع الموبايل في الميكروباص مروراً بصاحبك الي لازم يعرف مين الي اتصل بيك و انت قاعد معاه انتهاءاً بواحد مركز مع كلامك في اي حاجة بتكتبها على النت جوه قهوة...و اعتقد الى روج للموضوع ده اعلانات موبينيل الي دايماَ بتشجعنا اننا لازم نكون مع بعض و بحتاجلك و تحتاجني بس محدش اتفق معايا اني اتعامل او ابقي مع ناس فيهم كل العبر ديه لمجرد ان شايلانا نفس الارض و لو المشكلة كده هو احنا ليه مالعبناش عالأرض الاول
و بحالة الاكتئاب الي زي الزفت ديه قررت انهاء اول حاجة تتكتب كفتح كلام